යූත්මැක්ස් ගේ පත් ඉරුව෴

නිදහස සිංහල සමගින් නිදහසේ සිංහල ටයිප් කරන්න

2012-01-24T14:06:00.010+05:30

සිංහල ටයිප් කරන අයට නැතුවම බැරි කුඩා මෘදුකාංගයක් තමයි Keyman කියන්නේ. Keyman නැතිව සිංහලෙන් ටයිප් කරනවා කියන්නේ හරියටම කිව්වොත් වාහනයක යන්න තියන ගමනක් පයින් යනවා වගේ. ඒ තරම් වෙලා ගත වෙනවා. Alt එක්ක ASCII Code ගහන්න වෙනවා Numaric Key Pad එක ගෙවෙනකන්.

නමුත් මේකට හොඳම විසඳුමක් තමයි නිදහස කීමෑන් කියලා කියන්නේ. මේක අපි සංවර්ධනය කළේ 2001 දී. ඒ වෙනකොට වින්ඩෝස් XP ආවා විතරයි. අපි ඒ වෙනකොට Windows 98 වල ඉඳලා Xp වලට ආපු මුල්ම කාලෙ. Xp එක්ක වැඩ කරන එක මාර Fun උනත් අපි ඒ වෙනකන් සිංහල ටයිප් කරන්න පාවිච්චි කරපු ‘ම‘යන්න (MyPC සිංහල ටයිප් මෘදුකාංගය - අපි ඒකට ඒ දවස් වල කිව්වෙ ‘ම‘යන්න කියලා) Windows Xp වලට වැඩ කළේ නැහැ. ඒ නිසා Windows XP/98 Dual Boot තියාගෙන හිටියේ සිංහල ටයිප් කරන්නමයි.

මේකට විසඳුමක් හොය හොයා ඉන්න අතර තමයි අපේ චන්දු (චන්දන ප්‍රසන්න) හොයා ගත්තෙ Keyman කියලා software එකක් තියනවා; ඒක Xp වල සිංහල ටයිප් කරන්න පුළුවන් විදියට හදාගන්න පුළුවන් කියලා. අපි කොහොම හරි වැඩේ කළා.

මේක හදලා තියෙන්නෙ Keyman Version 5 වලින්. ඒ නිසා කිසිම අවුලක් නැතිව කොරල් ඩ්‍රෝ එක්ක වැඩ කරනකොට Corel Keyboard Shotcut පාවිච්චි කරන්න පුළුවන්. ඒත් Keyman Version 6 හෝ 7 වලින් හදපු සිංහල මෘදුකාංග එක්ක Corel Keyboard Shotcut වැඩ කරන්නෙ නැහැ.

මේක අපි කවදාවත් මුදලට දුන්නෙ නැහැ. එහෙම කළා නම් අපිට හොඳ ගානක් හොයා ගන්න තිබුණා. :-D අනෙක් හැම එකක්ම දෙන්නෙ මුදලට හින්දා අපිත් මේක ලෝකෙ තියන හොඳම මුදලට දෙන්න තීරණය කළා. ඔයාලටත් මේක අවශ්‍ය වෙයි කියලා හිතනවා නම් පහළ තියන ටොරන්ට් එකෙන් බාගන්න. ඒ වාගෙම අනිත් අයටත් ගන්න ලේසි වෙන්න seed කරලා තියන්න.

http://thepiratebay.org/torrent/6980765

පරිගණක පාඨමාලාවක් සම්පූර්ණයෙන්ම නොමිලේ හදාරන්න.

2010-11-30T17:50:00.003+05:30

කුරුණෑගල විශ්ව පරිගණක අධ්‍යාපන ආයතනය විසින් සම්පූර්ණයෙන්ම නොමිලයේ පවත්වනු ලබන පරිගණක පාඨමාලාවේ තෙවන කණ්ඩායම සඳහා දැන් සිසුන් බඳවා ගනු ලබයි. කිසිදු ගාස්තුවක් අය නොකරනු ලබන මෙම පාඨමාලාවන් විශේෂයෙන්ම හඳුන්වා දී ඇත්තේ වයස අවුරුදු 16-30 ත් අතර, පාසල් හැරගිය, අවිවාහක අය සඳහායි. පරිගණක භාවිතයට ඇල්මක් ඇති නමුත්, මූල්‍යමය අපහසුතා නිසා ඒ සඳහා වැඩි දුර අධ්‍යාපනය ලැබීමට නොහැකිව සිටින අයට මෙමගින් තමන්ගේ අරමුණු ඉටු කර ගත හැකියි.

මෙවර පරිගණක පාඨමාලාවන් 4 ක් හඳුන්වා දී ඇති අතර, එයින් තමන් කැමති පාඨමාලාවක් හැදෑරීමට සිසුන්ට හැකියි. එම පාඨමාලාවන් වන්නේ,

1. Type Setting & Page Designing
2. Microsoft Office
3. Graphic Designing
4. Computer Hardware & Operating Systems

මෙම සියලුම පාඨමාලාවන් මාස 06 ක කාලයක් පුරා දිවෙන අතර, ප්‍රවීණ දේශක මඩුල්ලක් විසින් මෙහෙයවනු ලබයි. මෙම සෑම පාඨමාලාවකටම සහභාගි වන්නන්ට නිදහස් හා විවෘත කේත (Free and Open Source) මෘදුකාංග භාවිතය පිළිබඳ සම්මන්ත්‍රණ වලට වරින් වර සහභාගි වීමට ද හැකියි. පාඨමාලාව අවසානයේ රජය පිළිගත් වටිනා සහතිකපතක් ද පිරිනැමේ.

ඔබත් මේ සඳහා සහභාගි වීමට අපේක්‍ෂා කරන්නේ නම්, පහත ඇති අයදුම්පත පුරවා 2010-12-05 දිනට පෙර “විදුහල්පති, විශ්ව පරිගණක අධ්‍යාපන මධ්‍යස්ථානය, 217/B, විල්ගොඩ පාර, කුරුණෑගල“ ලිපිනයට තැපැල් කරන්න. වැඩිදුර තොරතුරු 072-8843638 හෝ 0372220131 දුරකථන වලින් දැනගත හැකියි.

සැ.යු. පාඨමාලාව අවසානය දක්වාම හැදෑරීමට හැකි සිසුන් පමණක් ඉල්ලුම් කරන්න.

අයදුම්පත මෙතැනින් ලබා ගන්න.

Format Factory 2.45 දැන් 100% ක් සිංහලෙන්.....!

2010-08-03T12:16:00.007+05:30

අපි කවුරුත් හොඳින් දන්නා හඳුනන, ඉතාමත් ප්‍රයෝජනවත් වූ මෘදුකාංගයක් වූ Format Factory හි නවතම වෙළුම වන version 2.45 පසුගිය සති‍යේ නිකුත් කළා. ශ්‍රී ලාංකිකයන් ලෙස අපට මෙහි ඇති වැදගත්කම වන්නේ මෙම වෙළුම සමග මෙහි සිංහල සහාය 100% ක් ම අන්තර්ගත වීමයි. Format Factory 2.30 වෙළුමේ සිට සිංහල සහාය අන්තර්ගත වූවත් ඒ සමග සම්පූර්ණයෙන්ම සිංහල සහාය අන්තර්ගත නොවීය.

මෙම වෙළුම වින්ඩෝස් 7 සඳහා ද පූර්ණ වශයෙන්ම සහයෝගය දක්වනවා. සම්පූර්ණයෙන්ම නොමිලේ ලබා දෙන මෙය මගින් සිදු කර ගත හැකි කාර්යයන් නම් අති විශාලයි.

මේ පිළිබඳව වැඩි විස්තර මා විසින් මින් පෙර දක්වා තිබෙනවා. පහත සබැඳියෙන් ඔබට එය කියැවිය හැකියි.

http://uthmax.blogspot.com/2010/04/format-factory.html

Format Factory නවතම වෙළුම මෙතැනින් බාගත කරන්න.

Format Factory 2.45

සිංහල අතුරුමුහුණතෙහි Screen Shot කිහිපයක්

ලොව ජනප්‍රියතම නිදහස් මාධ්‍ය ධාවකය සිංහලෙන් නිකුත් වූ වග...෴

2010-07-25T22:05:00.000+05:30

ලොව ජනප්‍රියතම විවෘත කේත මාධ්‍ය ධාවකය වන, අපි කවුරුත් හොඳින් දන්නා හඳුනන VLC Media Player එකෙහි නවතම අනුවාදනය වන 1.1.1 පසුගිය 21 වැනිදා නිකුත් කළා. ශ්‍රී ලාංකිකයන් වන අපට මෙහි ඇති වැදගත්කම වන්නේ සම්පූර්ණ වශයෙන්ම සිංහල භාෂා අතුරු මුහුණත සහිතව නිකුත් වූ පළමු VLC වෙළුම මෙය වන නිසායි. සිංහල අතුරුමුහුණත සකස් කර ගැනීම දැන් ඉතාම පහසුයි. පළමුව පහත සබැඳියෙන් නවතම වෙළුම බාගත කරගන්න.

Download VLC 1.1.1 The luggage

ඊට පස්‍‍සේ VLC Media Player විවෘත කරගෙන Tools -> Preference -> Interface Setting වල Menus Language: කියන තැන තියෙන ගලා හැලෙන මෙනුවෙන් "සිංහල" තෝරන්න. එච්චරයි...

මා විසින් මෙය තව දුරටත් පරිවර්තනය වෙමින් පවතින්නේ. දෝෂ ඇත්නම් මීළඟ වෙළුම වන විට වහා නිදොස් කළ හැකියි. තවත් දෙයක් කියන්න තියනවා. ඒ තමයි, සමහර අවස්ථා වල සිංහල අතුරු මුහුණතේ අකුරු අතර අනවශ්‍ය පරතරයක් දකින්න පුළුවන් වෙයි. එහෙම වුනොත් ඒකට හේතුව වෙන්නේ ඔබේ පරිගණකයේ ස්ථාපනය කරලා තියෙන සමහර යු‍නිකේත අකුරු වල තියෙන දෝෂයක්. ‍එහෙම වුනොත් Bhashitha සහ Dinamina UniWeb කියන ෆොන්ට් තියනවාද කියල බලලා ඒවා ඉවත් කරන්න. එතකොට කිසිම ගැටළුවක් ඇති වෙන්නෙ නැහැ.

ශ්‍රව්‍ය සහ වීඩියෝ මාධ්‍ය භාවිතයේ දී නවමු ලෙසින් සිංහල අත්දැකීම විඳ ගන්න දැන් අපි හැමෝ‍ටම පුළුවන්. ඔබත් අත්හදා බලන්න. අනෙත් අයටත් හඳුන්වා දෙන්න.

VLC Media Player ළඟදීම සිංහලෙන්.....!

2010-06-02T21:05:00.001+05:30

VLC Media Player එකේ වැඩ කෑලි ගැනවත්, ඒකෙ ප්‍රයෝජන ගැනවත් අලුතින් කියන්න ඕන නැහැනේ. මම හිතන්නේ මේක භාවිතා නොකළ අයෙක් හොයා ගන්නත් අමාරු තරම්. ඒ තරමටම මේක ජනප්‍රියයි වගේම ප්‍රයෝජනවත්. දැනට තිබෙන සෑම ‍මාධ්‍ය ගොනු ආකෘතියක්ම පාහේ මේ මගින් පහසුවෙන් ධාවනය කරන්න පුළුවන්. VideoLAN කණ්ඩායම විසින් සංවර්ධනය කරනු ලබන මෙය වටිනා විවෘත කේත මෘදුකාංගයක්.

මේ කියන්න යන්නේ මෘදුකාංග දේශීයකරණය ගැන උනන්දු වෙන අයට වගේම සිංහලෙන් මෘදුකාංග වැඩ කරන්න ආශාවෙන් ඉන්න අයට වටිනා ආරංචියක්. ඒ තමයි මිළඟ VLC නිකුතුව වන 1.1.0 වෙළුම සමග මෙහි සිංහල සහාය අන්තර්ගත වන බවයි. මා විසින් මේ වන විටත් මෙහි පරිවර්තන කටයුතු කරමින් පවතින්නේ. දැනට 50% ක් විතර අවසන්.

VideoLAN ආයතනය මගින් මේ වන විට මෙහි අවසන් පෙර නිකුතුව වන 1.1.0-rc පසුගිය 26 ‍වන දින නිකුත් කළා. මේ සමග සිංහල සහාය අන්තර්ගතයි. නමුත් තවමත් මෙහි තෝරා ගත හැකි භාෂා ලැයිස්තුවේ සිංහල භාෂාව ඇතුළුව අලුතින් ඇතුළත් වීමට නියමිත භාෂාවන් පෙන්වන්නේ නැහැ. තවමත් ඇත්තේ 1.0.5 වෙළුමත් සමග පැමිණි භාෂාවන් පමණයි. නමුත් ඔබට මෙහි සුළු වෙනස්කමක් කිරීමෙන් සිංහල අත්දැකීම ලබා ගන්න පුළුවන්. මේ අත්දැකීම විඳින්න ඔබත් උනන්දු නම් පහත පරිදි සැකසුම් සකස් කර ගන්න.

පළමුව මෙතැනින් VLC නවතම වෙළුම වන 1.1.0-rc බාගත කර ගන්න.ඒක ස්ථාපනය කර ගත්තාට පස්සේ,
C:\Program Files\VideoLAN\VLC\locale\si\LC_MESSAGES ෆෝල්ඩරයේ තිබෙන vlc.mo කියන ගොනුව පිටපත් කරගෙන C:\Program Files\VideoLAN\VLC\locale\en_GB\LC_MESSAGES ෆෝල්ඩරයට පිටපත් කර ගන්න. ඊට පස්‍‍සේ VLC Media Player විවෘත කරගෙන Tools -> Preference -> Interface Setting වල Menus Language: කියන තැන තියෙන ගලා හැලෙන මෙනුවෙන් British English තෝරන්න.අන්තිමට Save ක්ලික් කරලා VLC නැවත ධාවනය කරන්න.

සමහර අවස්ථා වල සිංහල අතුරු මුහුණතේ අකුරු අතර අනවශ්‍ය පරතරයක් දකින්න පුළුවන් වෙයි. එහෙම වුනොත් ඒකට හේතුව වෙන්නේ ඔබේ පරිගණකයේ ස්ථාපනය කරලා තියෙන සමහර යු‍නිකේත අකුරු වල තියෙන දෝෂයක්. ‍එහෙම වුනොත් Bhashitha සහ Dinamina UniWeb කියන ෆොන්ට් තියනවාද කියල බලලා ඒවා ඉවත් කරලා බලන්න. ඒවාගේම ‍මේ සම්බන්ධව ඔයාලාගේ අදහස් කියන්න. තවම මේක අවසාන නිකුතුව නොවන නිසා තියෙන අඩුපාඩු ඔක්කොම අවසාන නිකුතුව නිකුත් වෙනකොට හදන්න පුළුවන්.

සිංහල මෘදුකාංග දේශීයකරණයට‍ මාව යොමුකළ ඩනිෂ්ක නවීන් සොයුරාටත්, VLC ධාවකයේ Maintainer ලෙස මා පත් කළ ශාලිත විකුම් සොයුරාටත් තුති෴

තවත් screenshots කිහිපයක්.

දුරකථන ඇමතුම් ලබා ගැනීමේ දී ප්‍රවේශම් වන්න.......!!???

2010-05-08T11:59:00.001+05:30

අද දිනයේ රට පුරා කටකතා මාර්ගයෙන් හා කෙටි පණිවුඩ මගින් අමුතුම කතාවක් පැතිර යනවා. ඒ මගින් කියවෙන්නේ නොදන්නා අංකයකින් පැමිණෙන හානිකර දුරකථන ඇමතුම ලබා ගැනීමේ දී ඒ මගින් අසන්නාගේ මොළයට හානිදායක කිරණ වර්ගයක් නිකුත් කරන බවත්, මේ වන විට දෙදෙනෙකු මේ හේතුවෙන් මිය ගොස් ඇති බවත්ය. තවත් අයෙක් මා හා පැවසුවේ එම ඇමතුම පැමිණි අයෙකුගේ දුරකථනය පුපුරා ඇති බවත්, ඔහුව රෝහල් ගත කර ඇති බවත්ය. අද උදෑසන ගුවන් විදුලි පුවත් විකාශ මගින් මේ ගැන ප්‍රචාරය කර ඇති බව සමහරු පවසනවා. තවත් අයෙක් මා හා පැවසුවේ මේ ගැන ජනාධිපති ආරක්‍ෂක අංශයෙන් ද දැනුවත් කර ඇති බවයි. පුදුමයට කරුණ නම්, මේ සිදු වූ සිදුවීම් කිසිවක් කිසිවෙකු ඇසින් දැක නොතිබීමයි. පුවත් විකාශය ඇසූ කෙනෙක් සොයා ගත නොහැකි වුවත්, අහවලා මේ ගැන කියූ බව නම් හැමෝම පවසනවා.

මා දන්නා ආකාරයට නම් අපගේ ජංගම දුරකථනයට එවැනි හපන්කමක් කරන්නට හැකියාවක් නැහැ. දුරකථන ඇමතුමක් මගින් මෙය සිදු කිරීමට කිසිසේත්ම හැකියාවක් නැහැ. ඒ නිසා කිව යුත්තේ මෙය අමූලික බොරුවක් බවයි. මේ ගැන පැතිරෙන කටකතා සියල්ලම අසත්‍ය බවයි. එබැවින් කිසිදු බියකින් තොරව ඔබට එන ඇමතුම් ලබා ගන්න. කටකතා කරුවන් සියල්ලම දැනුවත් කරන්න.

විහිළුසහගත එම කෙටි පණිවුඩයෙහි මෙසේ දැක්වෙයි. “Dont attend to calls from 7888308001, 9316048121, 9876266211, 9888854137, 9876715587. These numbers come in red colors. U may get brain hemrage due to high frequency. 27 persons died just recieving the call”

Format Factory නවතම වෙළුම දැන් සිංහලෙන්

2010-04-02T19:20:00.000+05:30

Free Time ආයතනය විසින් සකස් කළ ඉතාමත්ම ප්‍රයෝජනවත් වූ මෘදුකාංගයක් තමයි Format Factory කියන්නේ. වැදගත්ම දේ තමයි මේක ලබා දෙන්නේ නොමි‍ලයේ. මේක නමින් කියවෙනවා වාගෙම Format Factory එකක්ම තමයි. විවිධ මාධ්‍ය ගොණු ආකෘති ඉතා විශාල සංඛ්‍යාවකට සහය දක්වන මෙය මගින් කරගත හැකි දේවල් නම් අති විශාලයි. ප්‍රධාන වශයෙන්ම එක් ගොනු ආකෘතියක සිට තවත් ගොනු ආකෘතියකට හරවා ගැනීමට‍ මේ මගින් කළ යුත්තේ එක ක්ලික් කිරීමක් විතරයි. හැරවූ ගොණු වල තත්ත්වයත් සුපිරිම මට්ටමක තියනවා.

මේ මගින් පරිවර්තනය කර ගත හැකි ගොනු ආකාර වන්නේ...
වීඩියෝ
ඕනෑම වර්ගයක සිට MP4, AVI, 3GP, RMVB, WMV, MKV, MPG, VOB, MOV, FLV, SWF, GIF ‍වලට.

ශ්‍රව්‍ය
ඕනෑම වර්ගයක සිට MP3, WMA, FLAC, AAC, MMF, AMR, M4A, M4R, OGG, MP2, WAV, WAWPack

පිංතූර
ඕනෑම වර්ගයක සිට JPG, PNG, ICO, BMP, GIF, TIF, PCX, TGA

මීට අමතරව ඩීවීඩී වලින් වීඩියෝ ගොනු, Audio CD වලින් ඕනෑම ආකාරයක ශ්‍රව්‍ය ගොනු, ඩීවීඩී හෝ සීඩී වලින් ISO/CSO ඉමේජ් ගොනු වලට මෙන්ම ISO ඉමේජ් CSO බවටත්, CSO ඉමේජ් ISO බවටත් හරවා ගත හැකියි. එපමණක් ද නොව ඉහත දක්වා ඇති ඕනෑම වීඩියෝ ගොනු එකතු කර තනි ගොනුවක් බවට හැරවීම හා ඕනෑම ශ්‍රව්‍ය ගොනු එකතු කර තනි ගොනුවක් බවට හැරවීමත් කළ හැකියි.

මා විසින් මෙහි නවතම වෙළුම සිංහලට පරිවර්තනය කර තිබෙනවා. මෙය අපි කාටත් ඉතා ප්‍රයෝජනවත් මෘදුකාංගයක් වනවාට සැක නැහැ.

මෙන්න මෙතනින් බාගන්න.

කුරුණෑගලින් දඹ රන් පිළිම මතුවේ.

2010-03-14T19:26:00.000+05:30

අද (2010-03-14) කුරුණෑගල ගොකරැල්ල ප‍්‍රදේශයේ දී විකිණීමට සූදානම් කරන ලද, මෙරට මිල කළ නොහැකි වටිනාකමකින් යුත් පෞරාණික බුද්ධ ප‍්‍රතිමා තොගයක් කුරුණෑගල පොලීසිය මගින් අත්අඩංගුවට ගෙන තිබේ.

කුරුණෑගල කොට්ඨාස භාර ජෙ.පො. අධිකාරී වාස් ගුණවර්ධන මහතාට ලද තොරතුරක් මත, අද අළුයම 5.00 ට පමණ කුරුණෑගල මූ.පො.ප. අජිත් වංශනාත මහතාගේ අධීක්ෂණය යටතේ, පො.ප. රුවන් රණසිංහ, පො.ප. ඉංද්‍රජිත් දිසානායක ඇතුළු පොලිස් කණ්ඩායමක් වහාම ක‍්‍රියාත්මක වී අදාළ ස්ථානයට ගොස් ඇති අතර, සැකකරුවන් ඒ වන විටත් පලාගොස් සිටි බවත්, එහි තිබී පිළිම 06ක් හා රත‍්‍රං පරීක්ෂාවට ගන්නා රසායනික ද්‍රව්‍ය තොගයක් අත්අඩංගුවට ගැනීමට හැකි වූ බවත් පොලීසිය පවසයි.

විශාල ප‍්‍රමාණයේ කිරිගරුඩ පිළිම 02ක්, කි.ගැ. 50ක් පමණ බරැති දඹරං පිළිමයක්, ඉතා දුර්ලභ මැණික් ඔබ්බන ලද දඹරං නේත‍්‍රා පිළිමයක්, මැණික් ඔබ්බන ලද කුමාර පිළිමයක් හා තඹ පිළිමයක් ඒ අතර, තිබූ අතර පිළිම වල වටිනාකම මෙතෙක් ගණනය කර නොමැත.

සිද්ධියට සම්බන්ධ සැකකරුවන් අත්අඩංගුවට ගෙන අධිකරණයට ඉදිරිපත් කිරීමට විශේෂ පොලිස් කණ්ඩායමක් යොදවා ඇති බව පවසන කුරුණෑගල පොලීසිය, පරීක්ෂණ අවසන් කර නොබෝ දිනකින් මෙම පිළිම මහජන ගෞරවය සඳහා විවෘත කරන බවද වැඩිදුර අදහස් දැක්වූ ජේ.පො.අ. වාස් ගුණවර්ධන මහතා සඳහන් කරයි.

ස්වර්ණවාහීනී අසත්‍ය පුවත් විකාශය හෙලා දකිමු.

2010-03-06T12:38:00.000+05:30

2010 මාර්තු 05 වන දින රාත්‍රී ස්වර්ණවාහිනී පුවත් විකාශය කිරීමේ දී තොරතුරු හරි හැටි ‍විමර්ශනය නොකර අසත්‍ය පුවතක් විකාශය කර ඇත. වැලිමඩ මධ්‍ය විද්‍යාලයේ සිසුවෙකු තම පාසලේ සහෝදර සිසුන්ගේ මුදල් පසුම්බි හා වටිනා උපකරණ සොරා ගෙන අසු වූ විට ඔහුගෙන් ඒ පිළිබඳ විමසා සොරාගත් භාණ්ඩ හා මුදල් ආපසු ලබාගෙන විදුහල්පතිවරයා අතට පත් කළ ගුරුවරයෙකුට විරුද්ධව ජනතාව පෙළගැස්වීමට අනුබල දෙන ආකාරයේ පුවතක් විකාශය කර ඇත.

මෙහිදී ස්වර්ණවාහිනී වාර්තාකරු අදාළ සිද්ධිය පිළිබඳව පාසලේ විදුහල්පතිවරයාගෙන් හෝ, සිද්ධිය සිදු වූ අවස්ථාවේ සිටි ගුරුවරුන්ගෙන් හෝ එම අවස්ථාවේ සිටි සිසුන්ගෙන් හෝ කරුණු කිසිවක් නොවිමසා අදාළ පුවත ඉදිරිපත් කර ඇත. ජනමාධ්‍යවේදියාගේ කාර්යභාරය වන්නේ යම් කිසි සිද්ධියක් සිදු වූ පසු එයට අදාළ සියලු තොරතුරු සම්බන්ධයෙන් සොයා බලා නිවැරදි තොරතුරු ජනතාව වෙත ඉදිරිපත් කිරීමයි. නමුත් මෙහි දී එම අවම අවශ්‍යතාවයවත් මොහුගෙන් සිදු වී නොමැත.

දිනපතාම සවස් වරුවේ ක්‍රීඩා පුහුණුවීම් වල යෙදෙන සිසුන්ගේ මුදල් පසුම්බි හා වටිනා උපකරණ සොරා ගැනීම පුරුද්දක් කරගෙන සිටි අදාළ සිසුවා කිසිදු ක්‍රීඩාවකට හෝ සහභාගි නොවුනත් සවස් කාලයේ පාසලේ රැඳී සිටින්නේ සොරකම් කිරීම සඳහා බව පාසලේ ‍සිසුන් පවසති. ස්වර්ණවාහිනී පුවත් විකාශයෙන් සඳහන් කළේ මෙම සිසුවාට පහරදීම නිසා ඇති වූ සිත් තැවුල මත සිය දිවි හානි කරගත් බවයි. නමුත් මරණ පරීක්ෂණ වාර්ථාව ඉදිරිපත් කරමින් ප්‍රදේශයේ හදිසි මරණ පරීක්ෂකවරයා පෙන්වා දී ඇත්තේ මෙම සිසුවාට කිසිදු පහරදීමක් සිදු වී නොමැති බවයි. මෙයින් පෙනී යන්නේ ස්වර්ණවාහිනී ප්‍රාදේශීය වාර්තාකරු මරණ පරීක්ෂණ වාර්තාව පිළිබඳවත් සොයා නොබලා අදාළ වාර්තාව යොමු කර ඇති බවයි.

සිද්ධිය වූ අවස්ථාවේ එම ස්ථානයේ සිටි අනෙක් ගුරුවරුන්ගෙන් හා සිසුන්ගෙන් පොලීසිය කටඋත්තර ලබා ගෙන ඇත. එම කිසිදු කටඋත්තරයක අදාළ ගුරුවරයා සිසුවාට පහර දුන් බවක් සඳහන් නොවේ. එසේ නම් සව්ර්ණවාහිනී වාර්තාකරු තමාගේ පුවතට අදාළ සාක්ෂි ඉදිරිපත් කරන්නේ කෙසේද?

මෙම අසත්‍ය පුවත වහාම නිවැරදි කරන ලෙස මේ වන විටත් අදාල විද්‍යාලයේ විදුහල්පතිවරයා ස්වර්ණවාහිනියට දැනුම් දී ඇත.තමන්ගේ නාලිකාවට වැඩිපුර ප්‍රේක්ෂකයන් අද්දවා ගැනීමේ පහත් අභිලාෂයෙන් සාවද්‍ය පුවත් මවා ඉදිරිපත් කරන මෙවන් ආයතන සම්බන්ධයෙන් ජනතාව දෙවරක් සිතා බැලිය යුතු නොවේද? සත්‍ය දැනගන්න තමන් හා එක්වන ලෙස පවසන ස්වර්ණවාහිනිය අමු අමුවේ අසත්‍ය පුවත් ඉදිරිපත් කිරීම කෙසේ නම් අනුමත කළ හැකිද?

වෙලාව පෙන්වන්න ලස්සන Screensavers - Part 02

2009-11-11T17:27:00.000+05:30

ඔයාලට මතකද මම කලින් දුන්න ස්ක්‍රීන් සේවර් එක. මේ පාරත් දෙන්න යන්නේ ඒ වගේම අලංකාර ස්ක්‍රීන් සේවර් දෙකක්. කලින් දුන්න එක 322 දෙනෙක් බාගත කරල තිබුණා. ඒ නිසා තමයි මට මේ වගේ ටිකක් වෙනස් විදියට තියන ස්ක්‍රීන් සේවර් දෙකක් හදන්න හිතුනේ. බාගෙනම බලන්නකෝ කොහොමද ලස්සන කියලා...

Download Here

වෙලාව පෙන්වන්න ලස්සන Screensaver එකක්...

2009-10-31T09:45:00.000+05:30

ඔයාලට හිතුනොත් ස්ක්‍රීන් සේවර් එක‍ වෙලාව පෙන්වන විදියට සකස් කරන්න ඒක ඉතාමත්ම සරල වැඩක්. Windows වලදි නම් Screensaver වල 3D Text Screensaver එකේ සැකසීම් මගින් මේක ඉතාම ලේසියෙන් හදාගන්න පුළුවන්. ඒ වුණත් ඒක හරිම සාම්ප්‍රදානුකූලයි. ඒක දැකලම දැන් එපා වෙලා නම් ඉන්නෙ ටිකක් වෙනස් විදියට වෙලාව පෙන්වන ස්ක්‍රීන් සේවර් එකක් මම හැදුවා. හැදුව කියල කිව්වට මම කළේ හදපු එකක් ටිකක් වෙනස් කරල ස්ක්‍රීන් සේවර් එකක් බවට පත් කරපු එක විතරයි. මේක හදල තියෙන්නෙ ෆ්ලෑෂ් වලින්. මම මේ Flash Object එක හොයා ගත්තෙ http://sinhalenheena.blogspot.com වල තිබිලා.

මේක ඉතාම පොඩි Application එකක්. සම්පූර්ණ ප්‍රමාණය 840kb විතර. සමහර ස්ක්‍රීන් සේවර් වගේ පරිගණකයේ වේගයටවත් මතකයටවත් කිසිම බලපෑමක් කරන්නෙ නෑ. ස්පයිවෙයා, මැල්වෙයා වාගෙ තෑගිත් මෙයා ළඟ නෑ. ඒ නිසා බය නැතිව දාල බලන්න. හැබැයි මේක දාගන්න වෙන්නෙ Windows පාවිච්චි කරන අයට විතරයි. මොකද මේක තියෙන්නෙ exe එකක් විදියට නිසා.

Download

"ලංවිම සංවර්ධන ක්‍රියාවලියේ තාරුණ්‍යයේ හඬ"

2009-10-30T09:26:00.000+05:30

ලංකා විදුලි බල මණ්ඩලයේ කොන්ත්‍රාත් පදනම මත සේවය කරන පුහුණු සේවකයින් විසින් යොමු කළ ලිපියකි මේ෴

වසර 1994 සිට ශ්‍රමබල සැපයුම්කරුවන් හරහා වරින් වර ලංකා විදුලි බල මණ්ඩලයේ විදුලි සේවාවන් සඳහාත්, කාර්යාලීය හා අනෙකුත් සේවාවන් සඳහාත් බඳවා ගන්නා ලද අප සෘජුවම මණ්ඩලයේම සේවාවන් වල වසර 10, 09, 06, 05, 03 දක්වා වූ කාල පරිච්ඡේදයන් පසු කරමින් ලංකා විදුලි බල මණ්ඩලයේ සහෝදර සේවකයක් සමග සේවයේ යෙදෙමින් විදුලි සේවාවන් වල මනා පුහුණුවක් ලද මණ්ඩලයේ අභිවෘද්ධිය වෙනුවෙන් ඕනෑම මොහොතක තම නිපුණතාවය ලබා දීමට කැප වී ක්‍රියා කරන ‍සේවක ‍කොටසකි.

එසේම ශ්‍රී ලංකාවේ නිදහස් අධ්‍යාපනයෙන් අපට ලබා ගත හැකි උපරිමය වූ අ.පො.ස.(සා.පෙළ) විභාගය සහ අ.පො.ස.(උ.පෙළ) හදාරා විශ්ව විද්‍යාල වලට යාමට වරම් නොලද අප රජයේ කාර්මික විද්‍යාල වලින් සහ තාක්ෂණික ආයතන වලින් පාඨමාලා හදාරා එයින් ලබාගත් දැනුම ද සමග විදුලි බල මණ්ඩලයට එකතු වීමෙන් වසර ගණනාවක් සේවයේ යෙදෙමින් එහි දී ලබා ගත් මනා දැනුම සහිත 3000ක් පමණ පුහුණු සේවක පිරිසකි. අද වන විට ලංකා විදුලිබල මණ්ඩලයේ විදුලි සේවාවන් වල අධි සැර/වැඩි සැර/නඩත්තු/බිඳවැටුම්/පුනරුත්ථාපන සහ කැනීම් කටයුතු සඳහා ද, මණ්ඩලයට ආදායම එකතු කරමින් අයපත්කරු ලෙසිනුත්, කාර්යාලීය පරිගණක/ගිණුම් කටයුතු/පාරිභෝගික සේවාවල සිට රියදුරු දක්වා ද සේවයේ යෙදී සිටිමු.

මෙම කාලයේ දී අප සේවයේ යෙදී සිටිය දී සිදු වූ විවිධ අනතුරු වලින් පිළිස්සී, අතපය කැඩී, සුෂුම්නාවට හානි වී ඔත්පල වූ පිරිස ද ඉතා අසරණව කිසිදු දීමනාවක් ද නොමැතිව ‍ජීවත් වේ. අප සේවයේ යෙදවූ අතරමැදි සමාගම් පවා අපට සිදු වූයේ කුමක් දැයි සොයා බැලීමට පවා උනන්දු වූයේ නැත. ලංකාව පුරා සිටින ශ්‍රමබල විදුලි සේව‍කයෝ මෙවැනි තත්ත්වයකට මුහුණ දෙමින් සාමාන්‍ය පැය අටේ සේවාවට වඩා සේවයේ යෙදෙමින් වසර ගණනාවක් සේවයේ යෙදී සිටින අයවලුන් වන අතර, ලංවිම කාර්මික විද්‍යාලවල පුහුණු පාඨමාලා ද හදාරා අද වන විට ලංකා විදුලිබල මණ්ඩලයේ සිටින පුහුණු ‍විදුලි සේවකයන් වන්නෙමු.

අපහට නව රැකියාවක් සොයා ගැනීමට ද අසීරුය. ලංවිමටම සේවය කර අපගේ වයස් කාල පරිච්ඡේදය නව රැකියාවක් ලබා දෙන කාලය පසු කරගොස් ඇත. එසේම ස්ථිර වූ රැකියාවක් නොමැති කමින් අපගේ අනාගත අභිවෘද්ධිය උදෙසා යමක් සිතීමට පවා උගහටය. තරුණකම අපෙන් ඈත්වී යන්නා සේම රැකියාව වශයෙන් කරනු ලබන මෙම රැකියාවද අහිමි වීම අපගේ අනාගතය තවත් පිටුපසට තල්ලු කරනු ලැබ ඇත. අප කරනු ලබන රැකියාවට කැප වී සතුටින් අවශ්‍ය සේවාවන් මණ්ඩලයට ලබා දෙමින් ලබන වැටුපෙන් තවත් යැපෙන්නෝ බොහෝ දෙනෙක් පෝෂණය කරමින් සිටිති.

ස්ථිර රැකියාවක් නොමැති වයෝවෘද්ධ දෙමාපියන්ගේ යුතුකමද, පවුල වෙනුවෙන් ඉටු කිරීමට අප මත පැවරී ඇති වගකීමකි. පාසැල් යන නංගිලාටද, මල්ලිලාටද රැකියාවක් නොමැතිව සිටින සොහොයුර සොහොයුරියන්ටද අප ලබන වේතනයෙන් යැපීමට සිදු වී ඇත. කෙසේ නමුත් වසර ගණනාවක සිට මෙම කරන රැකියාවට අපි හිස නමා ගෞරවය කරන්නෙමු. එසේම අපගේ මව්බිමේ සංවර්ධනය උදෙසා විදුලිබල මණ්ඩලය ගන්නා ලබන අති භාරදූර සේවයට අපිද දායක වී සිටිති. අනතුරු අතිකාල කෙනෙහිලිකම් පසෙක ලා මණ්ඩලයේ ස්ථිර සේවකයන් සමග උරෙන් උර ගැටී අපි ‍සේවය ලබා දෙමින් සිටින්නෙමු.

නවලොව නව රැකියා ක්‍රමවේදය යැයි කියා ගන්නා ක්‍රමය අනුව වරින් වර හිමි වී හෝ අහිමි වී යන පදනම මත රැකියාව ලැබුණත්, අද වන විට අපගේ රැකියා වල අනාරක්ෂිත තත්ත්වය හේතුවෙන් වසර ගණනාවක් (මොන ක්‍රමවේදය අනුව හෝ) කරමින් සිටි රැකියාව අහිමි වෙතැයි යන බියෙන් පසු වෙමින් සිටි ස්ථිර රැකියාවක් නොමැතිව අප තාරුණ්‍යයේ හරි අඩකටත් වඩා කාල වකවානුවක් සතුටින් මෙම රැකියාවේ නිරත වෙමින් සිටියත් අද එම රැකියාවද අහිමි වී යන තත්ත්වයක් උදා වී ඇත.

අද අපට සිදු වී තිබෙන්නේ මෙම නව රැකියා ක්‍රමවේදය අනුව, සමාගම්යැයි කියාගන්නා සමාගම් නොවන අතරමැදි හවුල්කරුවන්ට දෙනු ලබන මුදලින් සුළු වේතනයක් පමණක් අපට ලබා දී රැකියාව ලබා දීමයි. ලංකාවේ මූල්‍ය සම්පත් ගැවසෙන ආයතන වලට මෙම සේවා සැපයුම් ආයතනයැයි කියාගන්නා අතරමැදියන් ඇස ගසාගෙන මෙම ක්‍රමවේදයෙන් ඔවුන‍්ගේ බැංකු ගිණුම් තරකර ගනිමින් සිටී. බොහෝ අතරමැදියන් වී සිටින්නේ දේශපාලකයින්ගේ නෑදෑයින් සහ මිතුරු කොන්ත්‍රාත් ව්‍යාපාරිකයන්ය. මෙම තත්ත්වය තුළ මූල්‍ය සම්පත් ඇති, ණය බරින් විශාල පාඩු ලබන අපගේ ආයතනය වැනි ආයතන වල මුදල් කෝටි ගණනින් අතරමැදියන්ගේ බැංකු ගිණුම් පිරී ඉතිරී යෑම පමණි.

ජල විදුලියෙන් පෝෂණය වෙමින්, දැවැන්ත විදුලි බලාගාර නඩත්තු කර ගනිමින් අති විශාල සම්පත් ප්‍රමාණයකින් සියලු ජන කොට්ඨාසයන්ට එහි ප්‍රතිලාභ ලබා දෙමින් ලංකා විදුලිබල මණ්ඩලය වැනි දැවැන්ත අර්ධ රා‍ජ්‍ය ආයතනයක මූල්‍ය සම්පත් කොටසක් අප හරහා සුළු අතරමැදියන් කීපදෙනෙකුට ප්‍රතිලාභ වශයෙන් ගෙවීම ඉතාමත්ම අසාධාරණය. මෙම ක්‍රමය අහෝසි වී අපගේ රැකියාව ලංකා විදුලිබල මණ්ඩලයේ පරිපාලනය හරහා ලබා ගතහොත් ඉතිරිවන මුදල ද අති විශාල බව කිව යුතුය.

ලංවිම තුළ අවුරුදු ගණනාවක සිටම රැකියා කර ඉවත් වන්නට සිදු වුවහොත් අපගේ වයස් කාලපරිච්ඡේදය ඉක්මවා ගොස් නිසා නැවත රැකියාවක් ‍‍‍සොයාගැනීමට අපහසු බව නිසාත් අප ඕනෑම පදනමක සිට ලංකා විදුලිබල මණ්ඩලයේ සේවය කරගෙන යෑමට එකඟවෙන නිසාත් එසේ හෝ සේවයේ පිහිටුවීම ඉතා සාධාරණය.

ර‍ජයේ දැවැන්ත සංවර්ධන වැඩපිළිවෙල සඳහා ලංකා විදුලිබල මණ්ඩලයෙන් සිදුවන කාර්යභාරය අති විශාලය. අද වන විට 3000ක් පමණ වන තරුණ අප ලංවිම තුළින් මනා දැනුමක් ලබා ලංවිම පුහුණු සේවකයන්ගේ රැකියාව කර ගනිමින් සිටින අයවලුන් වන අතර, නැවත අපට නව රැකියාවක් ලබා දීමට රජයට ගැටළුවක් නොවන බව කිව යුතුය. අතිගරු විධායක ජනාධිපතිතුමනි, ගරු විදුලිබල ඇමතිතුමනි, ගරු සාමාන්‍යාධිකාරිතුමියනි, ලංවිම සෙසු නිලධාරිවරුනි, ලංවිම ‍සේවකයිනි, වෘත්තීය සමිති නායකයින් සහ ලාංකීය කම්කරු නායකයිනි, මෙම රැකියා ක්‍රමවේදය තුළ අප නැවත විරැකියා පෝලිම් තුළ ගාල් නොවන ආකාරයේ විසඳුමක් මේ සඳහා ලබා දෙන්නැයි ඔබතුමන්ලාගෙන් කාරුණිකව ඉල්ලා සිටිමු.

- රටේ ජාතික සංවර්ධනයට දායක වන ලංවිම ශ්‍රමබල විදුලි සේවක සංවිධානය -

සංජීව 077 6578846
සුරංග 071 8165155
චන්දන 071 6003355
ප්‍රසාද් 071 8257737
අරුණ 071 8139639

ප්ලාස්ටික් බඳුන් වලට අපව මරණයට පත් කළ හැකියි෴

2009-06-11T12:45:00.000+05:30

ප්ලාස්ටික් අද වන විට අප කාට‍ත් නැතිවම බැරි දෙයක් බවට පත් වෙලා. ඛණිජ තෙල් හෝ ස්වභාවික වායූන් යොදාගෙන නිපදවන ප්ලාස්ටික් සැදී ඇත්තේ හයිඩ්‍රජන් සහ කාබන් අණු එක දිගට දාමයක් ආකාරයට එක් වීමෙන් ඇති වන දිගු දාම වලින්. මේවා Hydrocarbon ලෙස හඳුන්වනවා. වර්ෂ 1800 දී පමණ මුල් වරට ලෝකයා ප්ලාස්ටික් නිපදවා ගන්නා ආකාරය දැන ගත්තා. අද ලෝකයේ ඛණිජ සම්පත් වලින් 4.5% ක් ම යොදා ගන්නේ ප්ලාස්ටික් නිෂ්පාදනයට‍යි. මේ සම්බන්ධයෙන් කර ඇති විවිධ පරීක්ෂණ නිසා අද වන විට විවිධ ආකාරයේ අවශ්‍යතාවයන්ට ගැලපෙන අයුරින් ප්ලාස්ටික් වර්ග දහස් ගණනක් සොයාගෙන තිබෙනවා.

අද ලෝකයේ කවර තරාතිරමක පුද්ගලයෙකු හෝ වේවා දවසේ කවර මොහොතේ දී හෝ ප්ලාස්ටික් නිෂ්පාදන භාවිතයට ගන්නවා. මේ නිසා අද සමාජයට ප්ලාස්ටික් මගින් මානුෂික, සමාජයීය, කාර්මික, පාරිසරික හා‍ සෞඛ්‍යමය බලපෑම් අති විශාල ලෙස ඇති කර තිබෙනවා. ප්ලාස්ටික් මගින් සිදු වන සෞඛ්‍යමය බලපෑම් ගැන මේ ලිපියෙන් ඔබව දැනුවත් කරන්නට මා බලාපොරොත්තු වෙනවා.

අප භාවිතා කරන ප්ලාස්ටික් වර්ග ඒවා නිපදවීමට ගන්නා අමුද්‍රව්‍ය අනුව වර්ග කිහිපයකට බෙදෙනවා. මේවා පෙනුම, පාට, බර ආදී බොහෝ ලක්ෂණ වලින් සමාන වුවත් ඒවාගේ ගති ලක්ෂණයන් නම් කිසිසේත්ම සමාන වන්නේ නැහැ. පාරිභෝගිකයන්ට මේවා අඳුනා ගැනීම සඳහා පොදු සම්මතයක් ඇමෙරිකානු ආහාර හා ඖෂධ අධිකාරිය මගින් හඳුන්වා දී ති‍බෙනවා. එනම් සෑම ප්ලාස්ටික් ඇසුරුමකම ඒවා නිපදවා ඇත්තේ කුමන ප්ලාස්ටික් වර්ගයෙන් ද, ප්‍රතිචක්‍රීකරණය කළ හැකි ද යන්න ඇඟවෙන පරිද්දෙන් ත්‍රිකෝණාකාර ලාංජනයක් තුළ අදාළ අංකය සඳහන් කළ යුතුව තිබෙනවා. ප්ලාස්ටික් භාජන වල අඩියේ මෙවැනි සළකුණු ඔබ දැක ඇතුවාට කිසිම සැකයක් නැහැ.

ප්ලාස්ටික් නිපදවීමට ගන්නා අමුද්‍රව්‍ය වල තත්ත්වය මෙන්ම නිෂ්පාදන ක්‍රියාවලිය අනුවත් මේවා තත්ත්වයෙන් උසස් හෝ පහත් වෙන්න පුළුවන්. උසස් තත්ත්වයේ අමුද්‍රව්‍ය වල රසායන ද්‍රව්‍ය ඉතා තදින් බැඳී පවතින අතර ඒවා තද උණුසුමට, සීතලට, ආම්ලික හෝ භාෂ්මික තත්ත්වයන්ට, විවිධ තෙල් වර්ග වලට ඔරොත්තු දීමේ හැකියාවෙන් යුක්තයි. මෙවැනි උසස් තත්ත්වයේ ප්ලාස්ටික් වර්ග 'ආහාර ඇසිරීමට උචිත' හෙවත් Food Grade Plastic ලෙස හඳුන්වනවා. ලෝක සම්මතයට අනුව මේවා 'වීදුරුව සහ ගෑරුප්පුව' සළකුණින් දක්වා තිබෙනවා. අප ආහාර වර්ග ඇසිරීමට භාජන මිල දී ගැනීමේ දී මෙන්ම ආහාර ද්‍රව්‍ය අඩංගු භාජන ගැනීමේ දී ත්, කෑම පෙට්ටි, වතුර‍ ගෙනයා‍මට ගන්නා ‍බෝතල්, පිඟන්, කෝප්ප, හැඳි, ගෑරුප්පු ආදිය මිල දී ගැනීමේ දී ත් මේ ගැන අවධානය යොමු කිරීම අත්‍යවශ්‍ය කරුණක්. මන්ද යත් ඔබ මිල දී ගත යුත්තේ එවැනි ප්ලාස්ටික් වලින් තැනූ ඒවා පමණක්ම නිසායි.

ප්ලාස්ටික් වර්ග

1. පෙට් (PET) - Poly Ethilene Terephthalate
මේවා ඊතල තුනක් මැද අංක 1 සළකුණින් දක්වා තිබෙනවා.මේවා සකස් කර ඇත්තේ එක් වරක් පමණක් භාවිතා කර ඉවත දැමීම සඳහායි. වෙළෙඳපොලේ බහුලවම දකින්න තියෙන වතුර බෝතල්, බීම බෝතල්, කෑම පිසින තෙල් වර්ග අසුරා තබන බෝතල් මේ වර්ගය‍ට අයත් වෙනවා. මේවා අවර්ණ හෝ ලා නිල් වැනි ලා වර්ණයන්ගෙන් යුක්තයි. මේවායේ බ‍ඳෙහි කිසිම පෑස්සුම් සළකුණක් නැති අතර අඩියෙහි පමණක් ඇතුළට එබී ගිය තිතක් වැනි සළකුණක් දක්නට ලැබෙනවා. මේවා නිතර නිතර පාවිච්චි කිරීමේ දී මෙය සාදා ඇති දිගු දාමයන්ගෙන් සංයුක්ත අණු කැඩී ගැලවී එන්නට පුළුවන්. මේ බෝතල් උණු වතුරින් සේදීමේ දී හෝ සැර සබන් වලින් සේදීමේ දී ද මෙලෙස අණු ගැලවී එනවා. මේ කුඩා ප්ලාස්ටික් අණු හඳුන්වන්නේ Plastizicers හෙවත් Toxins (විෂ) ලෙසයි.

2. අධික ඝණකමින් යුත් පොලිතීන් (HDPE) - High Density Poly Ethilene
මේ වර්ගය ඊතල තුනක් මැද අංක 2 ලෙස‍ දක්වනවා. මේවා නිෂ්පාදනය කරන ආකාරය අනුව බඳෙහි අතට අසුවන ආකාරයේ සමමිතික දාරයක් දක්නට ලැබෙනවා. මේ ප්ලාස්ටික් වර්ගය භාවිතා කරන්නේ විෂබීජ නාශක දියර, පිරිසිදුකාරක දියර, පළතුරු යුෂ, කිරි වැනි දේ ඇසුරුම් කිරීමටයි.

3. පී.වී.සී. (PVC) - Poly Vinyl Chloride
මේවා අංක 3 ලාංජනයෙන් දක්වා තිබෙනවා. පී.වී.සී. නමින්ම හඳුන්වන බට වර්ග, බෝතල්, පෙට්ටි හා විනාකිරි වැනි දේ ඇසුරුම් කරන භාජනත් මෙයින් නිපදවනවා. මේවා බොහෝ දුරට පෙනුමින් HDPE වලට සමානයි.

4. අඩු ඝණකමින් යුත් පොලිතීන් (LDPE) - Low Density Poly Ethilene
මේවා අංක 4 ලකුණින් දැක්විය යුතුයි. ෂොපින් බෑග්, ග්‍රොසරි බෑග් සහ කෑම ඔතන ෂීට් සාදා ඇත්තේ මේවායින්.

5. පොලි ප්‍රොපලීන් - Poly Propylene
යෝගට් කෝප්ප, බීම බට, බෝතල් මූඩි ආදිය සකස් කර ඇත්තේ මේ ප්ලාස්ටික් වර්ගයෙන්. ඊතල තුනක් මැද 5 අංකයෙන් මේවායේ සළකුණ දැක්වෙනවා.

6. පොලිස්ටරීන් - Polystyrene
මේ ප්ලාස්ටික් වලින් පිඟන්, කෝප්ප, හැඳි, ගෑරුප්පු, යෝගට් කෝප්ප ආදිය නිපදවයි. මේවා අංක 6 යටතේ ගොණු කර තිබෙනවා.

7. විශේෂ අවශ්‍යතා අනුව නිපදවන ප්ලාස්ටික්
මීට අමතරව විශේෂ අවශ්‍යතා සඳහා ප්ලාස්ටික් වර්ග කිහිපයක් එක‍ට අලවා නිපදවන ‍ටෙට්‍රාපැක් (Tetrapack), මෙටලයිස්ඩ් (Metalized), පොලිඑතිලීන්(Poly Ethilene) හා විවිධ රසායනික සංයෝගයන්ගෙන් සාදන ප්ලාස්ටික් වර්ග අංක 7-19 යටතේ දැක්වේ.

මයික්‍රොවේව් උඳුන් සඳහා භාවිතා කිරීමට උෂ්ණත්වයට ඔරොත්තු දිය හැකි පරිදි නිපදවා ඇති 'මයික්‍රොවේව් කළ හැක' ලෙස සඳහන් භාජන පමණක් ම යොදාගත යුතුයි. මන්ද යත් අප භාවිතා කරන භාජනය Food Grade Plastic වුවත් උණුසුමට ඔරොත්තු නොදේ නම් එවිටත් ආහාර වලට විෂ (Toxins) එක් වීමේ විශාල අවදානමක් පවතිනවා. තෙල් සහිත ආහාර ද්‍රව්‍ය උණුසුම්ව ප්ලාස්ටික් භාජන වලට දැමීම මෙන්ම විනාකිරි, සෝස් හෝ ලුණු සහිත ආහාර උණුසුම්ව දැමීමත් එක සේ හානිකර වන්නට පුළුවන්.

ප්ලාස්ටික් වලින් ගැලවී ආහාර වලට එකතු විය හැකි විෂ වර්ග කිහිපයක් පර්යේෂකයින් විසින් සොයාගෙන තිබෙනවා. ඩයොක්සීන්ස් (Dioxins), ඇඩ්පේට්ස් (Adipates), පැතලේට්ස් (Phthalates), බිස්පීනෝල් ඒ (Bisphenol-A) එයින් සමහරක්. මෙවැනි විෂකාරක දිගින් දිගටම ශරීරගත වී ශරීර‍යේ තැන්පත් වීම නිසා අකල් මරණ, ශ්වසන පද්ධතියේ රෝග, පිළිකා, නොමේරූ දරු උපත්, ප්‍රජනක පද්ධතියේ විකෘති තත්ත්වයන්, හෘද රෝග හා හෝමෝන වල ක්‍රියාකාරීත්වය වෙනස් වීමෙන් ඇති වන විවිධ රෝග ඇති වන්නට පුළුවන්.

මෙහි දී අපට කළ හැකි වන්නේ හැකි තරම් අපගේ සෞඛ්‍යයට ගැලපෙන පරිදි භාජන තෝරා ‍ගෙන පාවිච්චි කිරීමයි. ප්ලාස්ටික් වර්ග නිපදවන සමාගම් වැඩි ලාභ අපේක්ෂාවෙන් බාල අමුද්‍රව්‍ය යොදා නියමිත සළකුණු සඳහන් නොකර ඇසුරුම් නිපදවීම තමයි අද වැඩි වශයෙන්ම සිදු වෙන‍්නේ. මේ නිසා මෙසේ විෂ ද්‍රව්‍ය ශරීරගත වී රෝගාතුර වන්නන් සීඝ‍්‍රයෙන් ඉහළ යාමේ අවදානමක් තියනවා. මේ සම්බන්ධයෙන් රජය කිසිදු සැළකිල්ලක් නොදැක්වීම අවාසනාවන්ත කරුණක්. විශේෂයෙන්ම සෞඛ්‍ය අමාත්‍යාංශයට හා පරිසර අමාත්‍යාංශයට මේ සම්බන්ධයෙන් බලපෑම් කළ යුතුව තිබෙනවා.

ප්ලාස්ටික් ඇසුරුම් වල ආහාර ඇසිරීමේ දී අනිවාර්යයෙන්ම 'වීදුරුව සහ ගෑරුප්පුව' සළකුණ ඇති භාජන පමණක්ම යොදා ගන්න. පාසල් යන ඔබේ දරුවාට සැහැල්ලු බව හෝ නොමිලේම ලැබෙන නිසා PET වර්ගයේ වරක් පාවිච්චි කර ඉවත දැමිය යුතු බෝතල් වලට ජලය ගෙනයන්න දෙන්න එපා. ගෙදරට තීන්ත හෝ වෙනත් රසායන ද්‍රව්‍ය ගෙනා ඇසුරුම් කිසි ‍විටෙක ආහාර ඇසිරීමට යොදා ගන්න එපා. මන්ද යත් තම ආදරණීයයන්ගේ ජීවිත රැක ගැනීමේ වගකීමත් ඔබ සතු නිසා.

මූර්ධජ 'ණ' යන්න පිළිබඳ සම්මතයන් - 01

2009-06-09T13:49:00.000+05:30

මෙයට පෙර ඉදිරිපත් කළ ලිපි වලින් සිංහල හෝඩිය ගැනත්, අක්ෂර හා අක්ෂරාණු ගැනත්, රේඵය, යංශය හා දකාරාංශය නිවැරදි ව යෙදෙන ආකාරය ගැනත් කථා කළා. අද සිට අපි කථා කරන්න බ‍ලාපොරොත්තු වෙන්නෙ න ණ ල ළ භේදය සම්බන්ධයෙන් ඇති රීතීන් සහ එම රීතීන්‍ට හසු නො‍වී මේ අකුරු යෙදෙන අවස්ථාවන් ගැනයි. එහි පළමු ලිපිය ලෙස මූර්ධජ 'ණ' යන්න ගැන සොයා බලමු.

ඇතැම් පද වල මූර්ධජ 'ණ' යන්න යෙදිය යුත්තේ ඊට මුලින් හෝ පසුව යෙදෙන අකුරක් නිසාය. එනම් ආණ්ඩුව යන්නෙහි 'ණ්' යනුවෙන් මූර්ධජව යෙදෙන්නේ 'ණ්' යන්න‍ට පසුව 'ඩ' අකුර යෙදෙන නිසාය. දක්ෂිණ යන්නෙහි 'ණ' යන්න මූර්ධජව යෙදෙන්නේ එයට මුලින් 'ෂ' අකුර යෙදෙන නිසාය.

සමහර පද වල 'ණ' යන්න යෙදීමට හේතුව පද සාධන රටාවයි. එනම් ඒ පද වල යෙදෙන ප්‍රත්‍ය වල 'ණ' කාරය ගැබ්ව පැවතීමයි. උදාහරණ ලෙස පවසන්නේ නම්, 'පියාණෝ' යන ගෞරවාර්ථ පදයේ 'ණ' යන්න මූර්ධජව යෙදීමට හේතුව එහි 'ආණ' යන ගෞරවවාචී තද්ධිත ප්‍රත්‍යය යෙදීමයි. 'වැටිණ' යන පදයෙහි 'ණ' යන්න යෙදෙන්නේ එහි 'ඉණ' යන ප්‍රත්‍යය යෙදීමයි.

තවත් සමහර පද වල 'ණ' යන්න යෙදීමට හේතුව නම්, සිංහල වචන කෝෂයේ එන පද වල ප්‍රකෘති වලම මූර්ධජ ණ යන්න ගැබ් වී පැවතීමයි. උදාහරණ දක්වන්නේ නම් ගණිතය, මැණික ආදියෙහි ප්‍රකෘති වලම මූර්ධජ ණ කාරය යෙදී ඇත.

සමහර පද 'දන්තජ න යන්න' හා 'මූර්ධජ ණ යන්න' දෙක වැරදි ලෙස ලිවිය හැකි වුවත් එවිට එයින් ගම්‍ය වන අර්ථය සම්පූර්ණයෙන්ම වෙනස් වේ. මෙයට උදාහරණ කිහිපයක් නම්

වන (කැළෑව) වණ (තුවාලය)
නුවන (ඇස) නුවණ (ඥානය)
ගන (දැඩි, තද) ගණ (සමූහය)
පහන (ප්‍රදීපය) පහණ (ගල, පාෂාණය)

වර්තමාන සිංහල භාෂාවේ මෙම අකුරු ‍දෙකෙන්ම නැගෙන්නේ එකම හඬක් බැවින් කිසියම් වචනයක යෙදෙන්නේ මොන න යන්න ද යන්න තේරුම් ගැනීම ආධුනිකයෙකුට ඉතාමත් අපහසු කරුණකි. බොහෝ තැන් වල දී නණලළ වැරදි ආකාරයෙන් යොදා තිබෙනු දැකීමෙන් ම මෙය පැහැදිලි වේ. සිංහල ලේඛකයන් අතර කාලාන්තරයක සිට පැවත එන රීති සමුදායක් මගින් මෙය තීරණය වෙයි. නමුත් අවාසනාවකට මේ අකුරු යෙදෙන හැම පදයක් ම මේ රීති වලට හසු නොවෙයි. උදාහරණ ලෙස ගෙන බැලුවොත් 'බණ්ඩක්කා' යන පදයේ 'ණ' යන්න මූර්ධජව යෙදෙන්නේ "ඩ යන්නට මුලින් යෙදිය යුත්තේ මූර්ධජ ණ යන්නයි" යන රීතියට අනුවය. නමුත් 'මුහුණ' යන්නෙහි 'ණ' යෙදෙන්නේ මෙවැනි රීතියක් අනුව නොවේ. එය ඒ පදය සමගම යෙදෙන බව වෙනමම මතකයේ තබා ගත යුතුය.

අක්ෂර වින්‍යාස රීති වලට අදාළ යම් පරාසයක් ඇත. මෙවැනි රීති වලට හසු නොවන පද වර්ග ද තිබෙන බව පහත උදාහරණ වලින් පෙනෙයි. එනම්

1. කතා කරන සිංහල භාෂාවේ යෙදෙන ක්‍රියා පද
අරින්ඩ, කන්ඩ, බොන්ඩ, දෙන්ඩ, ලියන්ඩ, කියන්ඩ වැනි පද

2. වෙනත් භාෂා වලින් (ඉංග්‍රීසි, අරාබි, පෘතුගීසි, ලන්දේසි වැනි) සිංහලයට එකතු වූ තත්සම පද
කැලැන්ඩර්, සිලින්ඩර්, බ්‍රැන්ඩි, ඉරානය, කුරානය වැනි පද

'ණ' යන්න භාවිතයට අදාළ රීතිත්, ඒවායේ පරාසත්, රීති වලට හසු නොවන පද වර්ගත් ගැන කොටස් වශයෙන් ඉදිරි‍යේ දී පළ කෙරෙනු ඇත.

පෙන් ඩ්‍රයිව් එකට මොකද වුණේ?

2009-06-04T15:53:00.000+05:30

මේක මට වෙච්ච දෙයක් නම් නෙමෙයි. මගේ යාලුවෙකුගේ පෙන් ඩ්‍රයිව් එකක්. වින්ඩෝස් වලදී මේක ගැහුවාම මැෂින් එන stuc වෙනවා. copy, paste. format මොනවත් කරන්න බැහැ. හැබැයි ලිනක්ස් වලදී නම් ගොණු සියල්ල පෙන්වනවා. copy, paste කරන්න පුළුවන් වුණත් format කරන්න නම් බැහැ write protect කියල තමයි කියන්නේ.
මේක හදාගන්න විසඳුමක් කියන්න පුළුවන් ද? නැත්නම් 8GB පෙන් ඩ්‍රයිව් එක අයින් කරන්න තමයි වෙන්නේ?

රේඵය, යංශය හා දකාරාංශය නිවැරදි ව යෙදෙන ආකාරය

2009-06-02T19:02:00.000+05:30

"ර" යන්න හා "රේඵය"

ව්‍යාංජන ශබ්දයකට ඉදිරියෙන් එන "ර්" ශබ්දය ලියා දැක්වීම පිණි‍ස යෙදෙන උඩු පිල්ල "රේඵය" නමින් හැඳින්වේ. රේඵය වර්තමානයේ යෙදෙන්නේ විකල්ප වශයෙන් පමණි. එනම් රේඵය වෙනුවට "ර්" යන්න ලිවීම මෙකල බහුල වශයෙන් සිදු කරයි.

උදාහරණ

"ර්" යන්න	ව්‍යාංජනය	රේඵය	වචනය	රේඵය රහිතව
ර්	ධ	ර්‍ධ	වර්‍ධන	වර්ධන
ර්	ෂ	ර්‍ෂ	වර්‍ෂ	වර්ෂ
ර්	ණ	ර්‍ණ	ස්වර්‍ණ	ස්වර්ණ
ර්	ත	ර්‍ත	වර්‍තමාන	වර්තමාන
ර්	ග	ර්‍ග	මාර්‍ග	මාර්ග

"ය" යන්නට ඉදිරියෙන් "ර්" යෙදෙන විට එය ලිවීම සඳහා නිවැරදි ආකාර තුනක් ඇත. ඉන් දෙවිධියකටම රේඵය යොදා ගනී.

ශබ්දය	1 වන ආකාරය	2 වන ආකාරය	3 වන ආකාරය
ර් + ය	ර්ය	ර්‍ය	ර්‍ය්‍ය

මේ අනුව බැලීමේ දී පහත දැක්වෙන පද නිවැරදිව ලියන ආකාර තුන මෙසේය.

1 වන ආකාරය	2 වන ආකාරය	3 වන ආකාරය
කාර්යාලය	කාර්‍යාලය	කාර්‍ය්‍යාලය
මහාචාර්ය	මහාචාර්‍ය	මහාචාර්‍ය්‍ය
ධෛර්යය	ධෛර්‍යය	ධෛර්‍ය්‍යය
ඓශ්චර්ය	ඓශ්චර්‍ය	ඓශ්චර්‍ය්‍ය
භාර්යාව	භාර්‍යාව	භාර්‍ය්‍යාව
තූර්ය	තූර්‍ය	තූර්‍ය්‍ය

වර්තමාන සිංහල ලේඛකයන් වැඩි රුචියක් දක්වන්නේ මෙහි පළමු ආකාරයෙන් ලිවීමට ය.එහි යම් සරල බවක් ඇතැයි යන්න මාගේ හැඟීමයි.

"ද" යන්න හා "දකාරාංශය"

ව්‍යංජන ශබ්ද කිහිපයකට ඉදිරියෙන් එන "ද්" ශබ්දය ලියා දැක්වීම සඳහා යොදා ගන්නා පිල්ල "දකාරාංශය" නමින් හැඳින්වේ.

එය ගාත්‍රාක්ෂරයට ඉදිරියෙන් එයට බැඳී සිටින අයුරින් ලියා දක්වයි.

දකාරාංශය යෙදෙනුයේ ඊට පසුව "ව" හෝ "ධ" යෙදීමේ දී ය. මෙය ද විකල්ප වශයෙන් යෙදෙන බැවින් වර්තමානයේ බහුලවම මේ ශබ්ද දකාරාංශයකින් තොරව ලියනු දක්නට ඇත.

උදාහරණ
"ධ" සමග

"ව" සමග

(සිංහල යුනිකේතය තුළින් මෙය ලිවිය හැකි ආකාරය මා හට සොයා ගැනීමට අපහසු විය. බොහෝ විට දකාරාංශය සිංහල භාෂාව ලිවීමේ දී අනිවාර්ය අංගයක් නොවන බැවින් යුනිකේතයෙන් ඉවත් කළා වන්නට ද පුළුවන. යුනිකේතයෙන් මෙය ලිවිය හැකි ආකාරය කවුරුන් හෝ දන්නේ නම් ඒ පිළිබඳ ව මෙහි සටහනක් එක් කරන්න)

ප්‍රභාකරන්ගේ මරණ දැන්වීම දුටුවා ද?...

2009-05-19T13:37:00.000+05:30

http://www.4shared.com/file/106343530/ec096bc1/Praba_death_notice_150r.html

අක්ෂර හා අක්ෂරාණු

2009-05-15T10:58:00.000+05:30

සිංහල භාෂාවේ භාවිතා වෙන වචන හා ශබ්ද ලියා දැක්වීමට යොදා ගන්නා රූප දෙවර්ගයක් තියනවා. ඒ තමයි,

1. මූලාක්ෂර
2. අක්ෂරාණු

මූලාක්ෂර හා අක්ෂරාණු කියන්නෙ මොනවද කියල අපි සරල උදාහරණයකින් පැහැදිලි කර ගනිමු. මේ වාක්‍ය බලන්න.

‘අද නාට්‍ය නැහැ’

මෙහි ‘අද’ යන්නෙහි ‘අ’ යන රූපයත් ‘ද’ යන රූපයත් ආදී වශයෙන් ශබ්දය ලියා දැක්වීමට යෙදෙන රූප වලට තමයි ‘මූලාක්ෂර’ කියල කියන්නෙ. එතකොට අක්ෂරාණු කියල කියන්නෙ කිසියම් ශබ්දයක් කිසියම් නිශ්චිත පරිසරයක යෙදෙන විට ලියා දැක්වීම පිණිස යෙදෙන විකල්ප රූපයට. ඒ කියන්නෙ ‘ආ’ කියන ස්වර ශබ්දය පදයක මුල හැර වෙනත් තැනක යෙදෙන කොට එය ලියන්න යොදා ගන්නා ‘ා’ යන රූපයත්, ‘ය’ යන ව්‍යංජන ශබ්දය වෙනත් ව්‍යංජනයකට පසුව යෙදෙන කොට ලියා දක්වන ‘්‍ය’ යන රූපයත්, වැනි ඒවට. මේ මූලාක්ෂරත් වර්ග දෙකක් තියනවා.

1. ප්‍රාණාක්ෂර
2. ගාත්‍රාක්ෂර

‘ප්‍රාණාක්ෂර’ කියන්නෙ පදයක මුල යෙදෙන ස්වර ශබ්දයක් ලියන්න යොදා ගන්නා මූලාක්ෂර වලට. ‘ගාත්‍රාක්ෂර’ කියන්නෙ ව්‍යංජන ශබ්දයක් ලියන්න යොදා ගන්නා මූලාක්ෂර වලට.

අපි ඉහතින් කතා කළ අක්ෂරාණුත් වර්ග දෙකක් තියනවා. ඒ තමයි,

1. ස්වර පිලි
2. ව්‍යංජන පිලි

ස්වර පිලි කියන්නෙ ස්වර ශබ්දයක් ලියන්න යොදන අක්ෂරාණු වලට. ඒ කියන්නෙ ‘ඉ’ යන ස්වර ශබ්දය ලියා දක්වන්න යොදන ‘ි ’ පිල්ල ‘ස්වර පිල්ලක්’.

ව්‍යංජන පිලි කියන්නෙ ව්‍යංජන ශබ්දයක් ලියන්න යොදන අක්ෂරාණු වලට. උදාහරණයක් විදියට ගත්තොත් ‘ය’ යන ව්‍යංජන ශබ්දය ලියා දක්වන්න යොදන ‘්‍ය’ නම් පිල්ල ව්‍යංජන පිල්ලක්.

අපි මොන තරම් ස්වර පිලියි ව්‍යංජන පිලියි යොදා ගත්තත් හැමෝම ඒවාට කියන නම් දන්නෙ නැහැනෙ. දන්නෙ නැති අයට දැනගන්නත් එක්ක මම ඒවගෙ නම් ලියන්නම්.

(මට මෙතනදි නම් පොඩි ගැටළුවකට මූණ දෙන්න වුණා. සිංහල යුනිකෝඩ් වලින් අක්ෂරාණු විතරක් යතුරු ලියනය කරන්න බැහැනේ. ඒ නිසා මම මේ ටික පිංතූර විදියට තමයි යොදා ගත්තේ. සිංහල යුනිකෝඩ් වලින් අක්ෂරාණු විතරක් යතුරු ලියනය කරන්න බැරි වීම ගැන මේ දවස් වල සිංහල යුනිකෝඩ් සමූහයෙත් සංවාදයක් යනවා. මගේ අදහස නම් මේක දුර්වලතාවයක් නෙවෙයි , පහසුකමක් කියලයි. අක්ෂරාණු විතරක් යතුරු ලියනය කරන්න නිතරම ඕන වෙන්නෙ නැහැනේ. කලාතුරකින් හරි ඕන වුණොත් මේ වගේ පිංතූරයක් විදියට යොදන්න පුළුවන්)

ස්වර පිලි

ව්‍යංජන පිලි

ඊළඟ පාඩමින් රේඵය, යංශය සහ දකාරාංශය යෙදෙන විධියත්, යෙදෙන තැන් ගැනත්, නිවැරදිව ලියන ආකාරය ගැනත් කතා කරමු.

අපි සිංහල ඉගෙන ගනිමු.

2009-05-13T17:21:00.000+05:30

සිංහල බ්ලොග් අඩවි ආරම්භ කළ කාල‍යේ පටන් ඒ හා සම්බන්ධ වෙමින් බ්ලොග් කියවීම මගේ දෛනික පුරුද්දක් බවට පත් වෙලා තියෙන්නේ. නොයෙකුත් බ්ලොග් අඩවි කියවනකොට මට නිතරම පෙනෙන දෙයක් තමයි ඉන් 95% කටත් වඩා අක්ෂර වින්‍යාස දෝෂ සහිත ඒවා බව. 35%කට වඩා වැඩි ගණනක් බරපතල ලෙස අක්ෂර වින්‍යාස දෝෂ පෙන්වනවා. මේවා කියවනකොට මට නිතරම හිතුණු දෙයක් තමයි, නිවැරදි අක්ෂර වින්‍යාසය සහ සිංහල භාෂාවෙ රීතීන් ගැන දැනුවත් කරලා ‍බ්ලොග් එකක් පටන් ගන්න ඕන කියන එක. අදහස හිතේ තිබුණත් කාල‍ වේලාවේ ප්‍රශ්න නිසා දවසින් දවසම වැඩේ කල් ගියා. නමුත් දැන් බය වෙන්න දෙයක් නැහැ. මම බලාපොරොත්තු වෙනවා මින් ඉදිරියට දිගටම බ්ලොග් එක ලියන්න.

සිංහල ඉගෙන ගන්න එක හිතන තරම් අමාරු දෙයක් නෙමෙයි. ගොඩක් වෙලාවට රීතීන් කිහිපයක් මත තමයි අක්ෂර වින්‍යාසය යෙදෙන ආකාරය තීරණය වෙන්නේ. ඒ නිසා හැම චවනයකටම එන්නෙ මොන 'න'යන්න ද, මොන 'ල'යන්න ද කියල එකින් එක මතක තියා ගන්න ඕන වෙන්නෙ නැහැ. රීති කිහිපය මතක නම්, ඉබේම නිවැරදි අකුරු යොදන්න පුරුදු වෙනවා. ඒ නිසා මම විශේෂයෙන් ම බලාපොරොත්තු වෙන්නේ සිංහල භාෂාවෙ තියන මේ රීති ගැන උදාහරණ එක්කම පැහැදිලි කරල දෙන්න.

සිංහල භාෂාව තුළ විවිධ මතභේද තිබෙන බව අපි කවුරුත් දන්නා සත්‍යයක්. ඒ කියන්නෙ තාම සිංහල භාෂාව තුළ අක්ෂර වින්‍යාසය හා ලේඛන ක්‍රම අතර පොදු සම්මතයක් නැහැ. විවිධ කණ්ඩායම් අතර සමහර කරුණු සම්බන්ධයෙන් මතභේද අදත් පවතිනවා. එනම් යම් කිසි වචනයක යෙදිය යුත්තේ දන්තජ 'ල' යන්න යැයි පිරිසක් කියද්දී, එහි‍ යෙදිය යුත්තේ මූර්ධජ 'ළ' යන්න බවට තවත් පිරිසක් තර්ක කරනවා. තම තමන්ගේ මතය නිවැරදි බව සනාථ කරන්නට ඒ ඒ පිරිස් විවිධ හේතු සාධකත් ගෙනහැර දක්වනවා.

මෙයට හොඳම උදාහරණයක් තමයි සිංහල භාෂාව හා වර්ගයා හැඳින්වීමට යොදන 'සිංහල' නම් නාමය. ශ්‍රී සුමංගල ශබ්දකෝෂයේ නිර්මාතෘ වන පූජ්‍ය වැලිවිටියේ සෝරත නායක ස්වාමීන් වහන්සේ මෙය 'සිංහල' ලෙස දන්තජ 'ල' යන්න යොදා ලියති. රාජකීය ආසියාතික සමිතිය (Royal Asian Society) අනුග්‍රහය දැක්වූ 'සිංහළ' ශබ්දකෝෂයේ මුල් අවධි‍යේ දී සඳහන් කර ඇත්තේ 'සිංහළ' ලෙසින්. ‍(උසස් පෙළ සිංහල භාෂාව උගන්වන වැවතැන්නේ විජිතසිරි හාමුදුරුවෝ අදත් යොදා ගන්නේ සිංහළ ලෙසයි. උන්වහන්සේ තර්ක කරන්නේ සිංහල වචනය සැදී ඇත්තේ සිංහ+ළය යන පද දෙක එක් වී බවයි)

යම්කිසි වචනයක් සම්බන්ධයෙන් මෙවැනි මතභේදයක් ඇත්නම් අප ගත යුතු මග කුමක් ද? මාගේ අදහස නම් එවැනි විටෙක බහුතර සම්මතය පිළිපැදීම වඩා යෝග්‍ය බවයි. මෙම බ්ලොග් එක තුළ දී එවැනි මතභේදාත්මක වචන ගැන විශේෂයෙන් සඳහන් කර බහුතර සම්මතය කුමක්දැයි යන්නත් පහදා දීම බලාපොරොත්තු වෙනවා.

යම් කිසි භාෂාවක ලිවීම සඳහා ‍යොදා ගන්නා අක්ෂර මාලාව 'හෝඩිය' කියල තමයි හඳුන්වන්නෙ. මහාචාර්ය ජේ.බී.දිසානායක මහත්තය කියන විදියට නම් හෝඩියට තියන අකුරු ගණන අනුව සිංහල හෝඩියෙ ප්‍රභේද හයක් තියනවා.
1. සිදත් සඟරා හෝඩිය - අක්ෂර 30
2. අමිශ්‍ර සිංහල හෝඩිය - අක්ෂර 32
3. මිශ්‍ර සිංහල හෝඩිය - අක්ෂර 54
4. ජාතික අධ්‍යාපන ආයතන ‍හෝඩිය - අක්ෂර 60
5. සමකාලීන සිංහල ‍හෝඩිය - අක්ෂර 60
6. ජාත්‍යන්තර සිංහල හෝඩිය (යුනි‍කෝඩ්) - අක්ෂර 61

මගේ වෑයම පරිගණක භාවිතයේ දී හැකි තරම් නිවැරදි සිංහල භාවිතා කිරීමට බ්ලොග් ලියන්නන් උනන්දු කරවීම බැවින් මා සම්මතය ලෙස භාවිතා කරන්නේ ජාත්‍යන්තර සිංහල හෝඩියයි. මේකෙ තිර පිටපතක් මෙතනින් බලන්න පුළුවන්.

තවත් දෙයක් තියනවා.මේ බ්ලොග් එක ලියනකොට වරදින තැන් තියෙන්න පුළුවන්. මොකද මම කලිනුත් කිව්ව විදියට සිංහල භාෂාවට තාම සම්මතයක් නැහැනේ. ඒ වගේම සාමාන්‍ය මිනිස්සු විදියට අපිට වරදින වෙලාවල් තියනවා. එහෙම තැනක් දැක්කොත් අනිවාර්යයෙන්ම පෙන්නලා දෙන්න. ඔබ සියලු දෙනාගෙම උපදෙස් සහ අදහස් මම හැම වෙලාවෙම බලාපොරොත්තු වෙනවා. මේ සම්බන්ධයෙන් බ්ලොග් අවතාශය තුළ කතිකාවක් ඇති කිරීමත් මගේ එක් අරමුණක්.

අක්ෂර සහ අක්ෂරාණු කියන්නෙ මොනවද කියල දැනගන්න නම් ඊළඟ ලිපිය බලන්න.

Test Post

2009-05-13T12:33:00.001+05:30

This is for testing

බ්ලොග් අවකාශයට ආයුබෝවන්෴

2009-05-06T16:09:00.000+05:30

ඔන්න මමත් බ්ලොග් ලියන්න පටන් ගත්තා‍. මෙච්චර කාලයක් හැමෝම එක්ක ප්‍රතිචාර වලින් තමයි සම්බන්ධ වුණේ. අද පටන් මේ හරහා මගේ අදහස් ඉදිරිපත් කරන්න බලාපොරොත්තු වෙනවා. හැමෝටම වැදගත් වෙයි කියල අදහස් කරන ලිපි පෙළක් ම ඉදිරියේ දී පළ කරන්න හිතාගෙන ඉන්නේ. වැඩි විස්තර පස්සෙ බලන්නකෝ...